ቅድሚ ንኻልኦት ከነመሓይሽ ምፍታና፤ 'ቐዲምና ካብኣቶም ዝሓሽና ንኹን!!

ቅድሚ ትማሊ ሰንበት ንግሆ እዩ። ኣብ ምጭውቲ ወደባዊ ከተማ ሞስ ‘Moss’፤ ኣብ ምዝዛም ናይቲ ንሰሙን መመላእታ /ካብ ሰንበት ንሰንበት/ ዝቐጸለ ምትእኽኻብ ነበርና። ድሕሪ ከምዚ ዝበለ ውዕ-ዉዕ ሕውነታዊ ቅነ፥ ምፍልልላይ ክኸብድ ግድን ነበረ። ዕላማ ምትእኽኻብ፡ ናይዞም ካብ ዝተፈላለዩ ቀቢላታት ኤርትራ ዝመጻእና ሰባት፤ ብኸመይ ብሕታዊ-‘ሜድያ’ ንምስርት ንምዝታይ እዩ ነይሩ። 

ቅድም-ቀዳድም፡ ዘቕረብናዮ ሕቶ ከኣ፡ “ስለምንታይከ ናይ ብሕትና ‘ሜድያ’ የድልየና፧ ምስዘን ዘለዋ ተሓጋጊዝና ዘይንሰርሕ” ዝብል ነበረ። ኣብታ ቀዳመይቲ ሰንበት ዘዝመስለና ምኽንያታት ሂብናሉ ነበርና። ኣብዛ ናይ መጨረሽታ ሰንበት ግን፡ ሓንቲ ግብራዊት-ኣጋጣሚት ተረኺባ። ዳርጋ ብሃውሪ ዝመጸት እያ። እቲ ጒዳይ ከምዚ ዝስዕብ እዩ ነይሩ፤

ንግሆ ሰንበት ስለ ዝነበረ፡ ዝበዝሑ ኣባላት እቲ ምትእኽኻብ ጋዓት ኣብ ምድላው ነበሩ። /ንነገሩ ካብ ሰንበት ክሳብ ሰንበት ጋዓት ኢና ቈሪስና። ኩሎም ቀቢላታት ኤርትራ ዘዘውትርዎ መግቢ እንተሃሊዩ ጋዓት ጥራይ እዩ። ብዙሕ ምስ ጋዓት ዝተእሳሰር ያታዊ ዛንታታት እውን ኣሎ።/

ብዝዀነ፡ ንሳቶም ኣብ ምግዓት እንከለዉ፡ ኣነ ድማ ነቶም ብሰንኪ ራሕቂ ቦታ፡ ኣብዚ ምትእኽኻብ ብኣካል ዘይተረኺቡ ኣሕዋትን ኣሓትን ጸብጻብ ናይ ቀዳም እህብ ነብርኩ። ኣብታ ዝጥቀመላ ዝነበርኩ ኮምፒተር፥ ‘Eritrean Smerrr for Change Room1’ ዝብል ሓደ ‘ሩም ፓልቶክ’ ተኸፊቱ ሰባት ይዛረቡ ነበሩ። ኣብቲ መጀመርታ፡ ብዛዕባ ምንታይ ይዛረቡ ነይሮም ኣድህቦ ኣይገበርኩሎምን።

ሃንደበት ግን፤ “ንመዛተዪ ዝዀነና ኣርእስትታት ነምርጽ!” ክብሉ ጀመሩ። ሰለስተ ኣርእስትታት ቀሪበን፤ ሓደ ብ‘Lenchia1’ ዝብል ‘nickname’ ዝእቱ ኣቦ ከኣ፡ “ድሕሪ ኢሳይያስ-ሲ ንሰማማዕ ዶስ ንገማማዕ፧!” ዝብል ኣርእስቲ ንዘተ ኣቕረበ። ብኣዝዩ መሳጢ መንገዲ ስለ ዘቕረቦ ድማ፡ ብ27 ዓብላሊ ድምጺ ዛዕብኡ ተዓወተትሉ። እቲ ዝተጠቕምሉ ቅዲ ደስ ዘብል ነበረ።

እዚ ኣርእስቲ እዚ፡ ምስቲ ኣቐዲመ ኣብዚ ፌስ-ቡክ ‘ሼር’ ገይረዮ ዝነበርኩ ስለ ዝመሳሰል ኣቓልቦይ ሰሓበ። ሓሳበይ ንምሃብ እውን ብሃግኩ። ኣብታ ኮምፒተር ሓደ ካብቶም ኣዕሩኽተይ፡ ‘geroon’ ብዝብል ‘ስም’ ኣትዩ ነበረ። ሓደ ካብ ተወለድቲ ዓሳውርታ እዩ። ናይ ሓሳብ ፍልልይ ስለ ዘይብልና፡ በቲ ናቱ ‘ስም’ ተጠቒመ ክዛረብ ጸገም ኣይነበረንን። ኢደይ ኣልዒለ፣ ሪጋይ ተጸብየ፣ ድማ ‘ማይክ’ ሒዘ ሓሳበይ ክህብ ጀመርኩ።

ገለ ካብዚ ንዛረበሉ ዘለና ኣብዚ ክረኤ ይኽእል እዩ

ኣይጸንሐን፥ እቲ ብስም ‘Obama-56-1’ ኣትዩ ዝነበረ ‘ኣድሚን’ ሰማይ ኣስጊዱ ካብ ‘ሩም’ ኣንጢሩ ኣውጽኣኒ። ሪጋይ ሓሊየ እየ መጺኤ ነይረ። ብግሊ እውን ንዝዀነ ካብኣቶም ኣይተጻረፍኩን ኣይዘለፍኩን እውን። ‘ሩም ስመር’ ምስ ኩሉ ዘለዎ ጸገማት፥ ኣብ ምንቃሕ ናይቲ ኣብ ‘ዲያስፖራ’ ዘሎ ዜጋ፡ ዝዀነ ይኹን መዳርግቲ ዘይርከቦ ተራ ተጻዊቱ እዩ። ሕጂ እውን ‘ይጻወት’ ኣሎ። /‘ይጻወት ኣሎ’ ምባለይ፡ ጸወታ ናይ ዳእላ ከይትቘጽርዎ ሓደራ/፡ ተርኡ የበርክት ኣሎ ንምባል እየ።

ከም ሓቂ ኣነ እውን ብዓቕመይ ዕዱም ዝዀንኩሉ ግዜ ነይሩኒ እዩ። ገለ ኣባላቱ እውን ብግሊ ሰብ-ጽቡቐይ እዮም። ብዓይኒ ነቐፌታ እንተ ተጣማሚትና ግን፥ ‘ስጋይ ስጋኻ’፡ ዝበሃሎ ነገር የለን። ኣነ ድማ፡ ከም ቡዳ ብፈተውተይ ናይ ምጅማር ባህሪ ኣለኒ። ስለዚ፡ እዚ ዝቕጽል ጽሑፍ ዘቕርብ ዘለኹ፡ ስለ ዝፈትዎም እየ፤ እምበር ጸሊኤዮም እንተ ዝነብር ግዝየይ ዘቕትል ነገር እውን ኣምበይ-ምሃለወንን።

ገለ ሰብ ኣብ መንጐ ነቐፌታን ጸለመን ዘሎ ጋግ ኣይረእዮን እዩ። ኣነ ድማ ካብ ቃላቶምን ተግባራቶምን ተበጊሰ እየ ዝጽሕፍ ዘለኹ፡ እምበር ኣብ ጥራሕ ጐልጐል እሃልል የለኹን።

ዳርጋ ዝበዝሑ፡ ኣብዚ ‘ሩም’ ዝነበሩ ተዛተይቲ፡ ካብቲ፡ “ሆየ’ና ሆየ፤ ሆየ ዘይበለ ካባና ‘ፈለ!” ዝፍልስፍንኡ ሕብረተሰብ ከበሳ ዝተፈጥሩ እዮም ዝጥዕሙ። እቲ ኣነ ከቕርቦ ሒዘዮ ዝነበርኩ ሓሳብ ድማ ምስኣቶም ‘ሆየ’ ዘብለኒ ዘይምንባሩ እርድኣኒ ነይሩ እዩ። ንዓኣቶም ባህ ዘይትብሎም ዘረባ እንተ ኣቕሪበ፤ እንታይ ክገብሩ ከም ዝኽእሉ እውን ግምት-ሲ ነይሩኒ እዩ። እዚ ናይ በይኖም ዘይኰነስ፡ ናይ ኩለን ኤርትራውያን ‘ሩማት’ መለለይን ናይ ሓባር ረቛሕን እዩ። ምስምማዕ ሕድ-ሕድ ዝበሃል ነገር ቦታ የብሉን። ሓደ ሰብ ደስ ዝብለካ ቅኒት ይሃርመልካ፥ ንስኻ ድማ ቈለኻ ከም ዝወረደልካ ተጒርዕ። በቃ! ንሳ እያ።

እንተዀነ ግን፡ ነቶም ምሳይ ተጋቢኦም ዝቐነዩ መሳርሕተይ፡ “ስለምንታይ እዩ ናይ ገዛእ-ርእስና ‘ሜድያ’ ዘድልየና፧” ብዛዕባ ዝብል ሕቶ፡ ሓደ ግብራዊ-መልሲ ከርእዮም እደሊ ነይረ እየ። ብኸምኡ ድማ እየ ነቲ ሓሳብ ብኸክንዲ ደንጐልኡ ከም መንደረጋሕ ናብቲ ‘ሩም’ ዝፈነኽዎ።

እቲ ዘገረመኒ፡ እቲ ብ‘Obama-56-1’ ኣትዩ ዝነበረ ‘ኣድሚን’ ንዓይ ብቐይሕ መዓንከራ መልሓሰይ ምስ ቁለፈኒ፡ ብውሕዱ ንሱ እውን ትም ክብል ወይ ብዛዕባ ካልኡ ክዛረብ እየ ዝጽበዮ ነይረ። ንሱ ግን ብዛዕባ እቲ ዝበልክዎ ክምድርን ክትንትንን ጀሚሩ።

“ሰምዒኩምዎ ዶ ኣሕዋት፤ ‘ቈላን ከበሳን’ ኢሉ ነዚ ለባምን ሓድነቱ ከም ዓረ ዝተረረ ህዝቢ ክበታትን . . .” እቲ ዝቐጸለ ዘረባ ብዙሕ እውን ኣይዝክሮን። እቲ ህዝቢ ለባምን ሓድነቱ ከም ዓረ ዝደልደለን እንተዀይኑ ድኣ ስለምንታይ ኣፍና ንሉጔም፧ ስለምንታይከ ንስኻ ክትከላኸለሉ ድቃስ ትስእን፥ ነቲ ለባም ኢልካ ትኣምኖ ህዝብኻ ምስተር ኦባማ፧ ንሕና ንዓሻን ዕድሚኡ ንዘይኣኸለ ህጻንን ጥራይ ኢኻ መንገዲ ክትሕብሮ ከም ዘለካ ንፈልጥ። ወዮ ለባም ድኣ ለባም እንድዩ - ልቦና መካፈለ እምበር ከም ትሕቲ-ዕድመ ዲኻ ትከናኸኖ!!

ንምዃኑ እቲ ኣንጻሩ ትቃለሱ ዘለኹም ስርዓት፡ እዛ ትገብርዋ ዘለኹም ከም ዝገበረ ትፈልጡ ዶ፧ ነተን ዝርካበን ናይ ብሕቲ-ጋዜጣታት ሸውዓተ መዓሙቕ ኣእትዩ ምስ ዓጸወንን፤ ን‘ሜድያ’ ድማ ምስ በሓቶን፤ ከም ቃሕትኡ እዩ ከጸልመን ጀሚሩ። ጠይብ - ተግባራት ናይዚ ስርዓትን እዚ ምስተር ‘ኦባማ’ ኣብ ‘ሩም ስመር’ ዝገበርዎን ብምንታይ ይፍለ፧

ብመሰረቱ እውን፡ ኣብ ኤርትራ ሕጊ ፕረስ ክፍቀድ እንከሎ፤ እቲ ስርዓት ሰለስተ ህዝቢ ዘየስተብሃለለን ተኣፈፍቲ ‘ፈንጂታት’ ተኺሉ ነይሩ እዩ። “ልኡላውነት ሃገር፥ ሓድነት ህዝቢ፥ ሃገራዊ ጸጥታ” ዝብላ። በዚኤን ገይሩ ድማ እዩ ህዝቢ ዘጥፈኤን ዘጥፍእ ዘሎን። ኣሕዋትና ድማ በታ ጸላኢኹም ዝሓረደላ ካራ ትማጃለጡ ንርእየኩም ኣለና። እዘን ናብ ቃሕ ዝበለካ ኣንፈት ዝምጠጣ፡ ሰለስተ ኣምራት ከይዓነዋ ድማ፥ ኤርትራ፡ ሎሚ ይኹን ጽባሕ ንዋያ እያ!

ኣብዚ ከይጠቐስክዎ ክሃልፍ ዘይደሊ፤ bella76ን beilulን ብዝብል ‘nickname’ ዝኣትዉ ዝርከብዎም፡ ገለ ሰባት፡ ሓሳበይ ክውድእ ዕድል ክወሃበኒ ዝሓተቱ ነይሮም እዮም። ‘Feyfey’ ኢሉ ዝኣቱ ምቕሉል ‘ኣድሚን’ ዝርከብዎም ‘ኣድሚናት’ ግን፤ “ተቓላሳይ ምዃኑ ንፈልጥ ኢና። እዚ ኣልዕሊዎ ዝጸንሐ ኣርእስቲ ግን ምስ ኣሕዋትና ደቂ መታሕት ዝፈላሊ ሓደገኛ ዛዕባ እዩ” ብምባል ኣቕቢጾም። ኣነ እውን ኣምበይ-ምተዛረብኩን። እቲ ዕላማ ናብቲ ‘ሩም’ ዝዓለመ ዘይኰነስ ናብቶም ምሳይ ዝነበሩ መጋብእተይ እዩ ነይሩ - ንሱ ድማ ድሮ ብግብሪ ርእዮሞ ነበሩ።

እቲ ዝገረመኒ፡ ነቲ ተጠቒመሉ ዝነበርኩ ‘geroon’ ‘ገሩን’ ዝብል መጸውዒ ከይተረፈ፡ ‘ጅሮም’ እናበሉ እዮም ዝጽውዕዎ ነይሮም - እቶም ሰብ ‘ሩም’። ነዚ ብህዝቢ መታሕት ወግሐ-ጸብሐ፡ “ገሩን መንባ ገራይን!” እናተባህለ ዝዝየመሉ እኳ ብኸመይ ይጽዋዕ ዘይፈለጡስ፡ ተዓሚትካ፡ “መታሕት ኣሕዋትና” መውጽኢ ኣፍካ ምግባር ጨለነት ድዩ ክቚጸረለይ - ልዕሊ ጳጳስ ካቶልክ ምዃን፧!

ብዝዀነ፤ እቶም ዝለበሙን ዝተማህሩን ኢልና ከም ትእምርቲ-ሃገር እንርእዮም ኣቦና ወልድኣብ ወልደማርያም /ወልወል/ ነቲ ዘረባ ወዲኦሞ እዮም - ቀደም። “ኤርትራውያን ንኸይንሰማማዕ ተሳማሚዕና ኢና!!” ኢሎም ከቲመሞ። ድሕሪኦም ምዝራብ ድማ፡ ንሃተምተም ክንሱ እዩ።

ምምሕዳር እንግሊዝ እውን ብሃውሪ ኣይኰነን ንእማመ ‘Bevin – Sforza’ ኣምጺእዎ። ለባም ህዝቢ ረኺቡ እንተ ዝነብር ድማ እቲ ወርቃዊ ዕድል፡ ንህዝቢ ኤርትራ ከም-እንደ-ማንም ኣይምሓለፎን ነይሩ። ሕጂ እውን እንተዀነ፡ ድሕሪ እቲ ኹሉ ሸንኰለን-ኰለልን እቲ ፍታሕ ኣብኡ ጥራይ እዩ ክርከብ።

ኣብ ኤርትራ፡ ከበሳን መታሕትን፡ ሓደ ሃገር ምዃን እሞ ንግደፎ፤ ጐረባብቲ ሃገራት ኰይኖም ብሰላምን ስኒትን ክነብሩ እንተኺኢሎም ጥራይ እውን ዓቢ ጸጋ እዩ። ነዚ ሓቂ እዚ፡ ዝያዳ እንፈልጦ፡ እቶም ኣብ ‘ወይነ-ደጋ’፡ ከም ቃንጢሻ፡ ኣብ መንጐ ክልቲኦም ተቐርቂርና ዝተፈጠርና ጥራይ ኢና። ንኹሎም ስለ ዘይንብጻሖም፡ ሕማም ኩሎም ክረኣየና ጸገም የለን። እምበር ከበሳ ድኣ ቅድሚ ብዛዕባ መታሕት ምሕላሞም፥ ኣብ መንጐ ሰለስተ ኣውራጃታቶም ስኒትን ፍቕርን መውስቦን ይፍጠሩ ቅድም። ምስ መታሕት ዘሎ ‘ኣውሃም’-ሲ ይጽንሓሎም ደሓን።

ዝዀነ-ኾይኑ፤ ሕጂ ሰኑይ ምሽት፡ ሰዓት 11 ለይቲ እዩ ዘሎ። ነዛ ናይ ‘ሩም ስመር’ ጽሕፍቲ ክጽሕፍ እንከለኹ፥ ‘ሩም ስመር’ ድማ ኣትየ እሰምዕ ኣለኹ። ሓደ ‘ASLX1’ ኢሉ ዝኣተወ ወዲ ብቛንቋ እንግሊዝ ይዛረብ ነበረ። እቲ ኣቐዲምና ዝጠቐስናዮ ‘ዓምና’ ‘Lenchia1’ ብዝብል ‘ስም’ ዝኣቱ ኣቦ ከኣ፡ ኣብ መንጐ ነጢሩ ብምእታው፤

“ብሓደ ካብ ኤርትራዊ ቋንቋታት ክትዛረብ ዘይትኽእል እንተዀንካ ዘረባኻ ኣቋርጾ። እንግሊዝ ቀደም ዝፈላለየትና ይኣኽላ። ሰርቲፊኬት ናይ ብቕዓት ቋንቋ እንግልዘኛኻ ንዓና ኣየድልየናን እዩ!” ኢሉ ከይኣኽሎ፤ ካብ ቁርኣን ከይተረፈ ሓደ ‘ኣያ’ ጠቒሱ ነቲ ተዛራባይ ጠጠው ኣበሎ። ‘ሩም’ ዳርጋ ናብ ዕዳጋ ልኻይ ተቐዪራ። ኣብ መንጐ ይዛረብ ዝብሉን ዝቃወሙን።

ገለ፡ “ብዓረብኛ ይዛረብ እሞ ክትርጐመልና” ዝበሉ እውን ነይሮም። ገለ ድማ፡ “ዓረበኛ እውን ቋንቋ ኣዴና ኣይኰነን!” ወሲዀም። እቲ ዝገርም፡ ነታ ሃገር ብቛንቋ ኣዲኦም ዝዛረቡ ሰባት ጥራይ እንተዀይኖም ዝደልዩላ ዘለዉ፥ ነዞም ኣብ ስደት ዝተወልዱ ‘ብሃማት ቋንቋ-ደ’ ደቈም ድኣ ኣበየናይ ‘እስካሪኰ’ ከእትውዎም እዮም ጽባሕ፧!!

ብዝዀነ፡ እቲ ዘረባ ዝተሓረሞ ‘ASLX1’፡ “ኣሓስ ተዘሚተን እየን፡ እንተ እቲ ጸርፊ እሞ ዝገደፍና የብልናን!” እዩ ገርዋ ንነገር።

ካብ መንጐ እቲ ብቛንቋ እንግሊዝኛ ዝጽሕፎ ዝነበረ ብዙሕ፡ “I AM CREATING MY OWN PARTY AND MY OWN ROOM” ዝብል ነበሮ። /እዚ ናይ እንግሊዘኛ ጽሑፍ፡ ኣብዚ ስኢለ 'ፖስት' ገይረዮ ዘለኹ ስእሊ፡ ብታሕቲ ከተንብብዎ ትኽእሉ ኢኹም/። ንሕናስ ካብዚ ሓሊፍና እንታይ ዶ ኢልና ኢና ድኣ፧! በዓል ኣማኑኤል ኣሰና፡ ኤርሳ ጭሩም-ሲ፡ ሜሮን ስቲፋኖስ፡ ኣባ ሙሴ ዘርኣይ . . . ሲ ዘይምስ ኤርትራዊ ሓቢርካ ክስራሕ ከም ዘይከኣል ምስ ፈለጡ እዮም ነናይ ሓደ ሰብ ማሕበራት ዝመስረቱ!

ኣብ መጨረሽታ፡ እቲ ሰንበት ንግሆ፤ “ድሕሪ ኢሳይያስ-ሲ ንሰማማዕ ዶስ ንገማማዕ፧!” ዝብል ዛዕባ ዘልዓለ ‘ዓምና’ ‘Lenchia1’ “ኣብዛ ‘ሩም’ ወይ ኣነ፡ ወይ እዚ ‘ASLX1’ ዝበሃል ዘሎ ጥራይ እዩ ክቕጽል ዝኽእል!!” ብምባሉ፡ እቲ ምግምማዕ ድሕሪ ኢሳይያስ ጥራይ ዘይኰነስ ቅድሚ ኢሳይያስ እውን ድሮ ንነብሮ ከም ዘለና - እዩ በሪሁለይ ነዓይ።

ብዝዀነ፡ ብዛዕባ ‘ፓልቶክ’ ዘልዓልናዮ ዛዕባ ንኸነጠቓልል ሓንቲ ተረኽቦ ‘ፓልቶክ’ ክንጸዊ።

ሓደ ‘Eritrean unity worldwide EPLF1’ ዝባሃል ‘ሩም’ ደገፍቲ ኣሎ። ከም ኣጸዋውዕኦም እኳ ‘ሩም’ ሃገራውያን እዩ ዝበሃል። ንኢሳይያስ ዘይትንእድ ቃል፡ ወይ ዝዀነ ይኹን ስቓይ ኤርትራ ክሰምዕ ፍቓደኛ ዘይኰነ ‘ሩም’ እዩ። ሓደ ግዜ፡ ኣብዚ ‘ሩም’ ኣትየ እናሰማዕኩ ድቃስ ወሲዱኒ። ዳርጋ ድቃስ ኣሽኪዓትኒ እዩ ዝበሃል። ድሓን ኣይትእቶ፡ ሃንደበት ድማ ተለፎን ደዊላ። ተለፎን ከልዕል ክብል ኮምፑተር ስለ ዝተንከፍኩ ‘ማይክ’ ነጢራትኒ። እታ ትድውል ዝነበረት ሰብ ሓንቲ ንኤርትራ ክትበጽሕ ዝደለየት ጓል እያ ነይራ።

“ሕጂ እሞ እንታይ ንኤርትራ ዘኽይድ ነገር ኣሎ እዩ፧” ክብላ እንከለኹ እዩ ድምጸይ ኣብቲ ‘ሩም’ ተሰሚዑ። ብድመጸይ ቀልጢፎም ቈብ ኣቢሎሙኒ። /ንምዃኑ ኣብ ‘ፓልቶክ’ ድምጺ ጥራይ ኣይኰኑን ዘላሊዩ። ትገርመኒ ነገር እንተ ሃሊያ፥ ዋላ ቅድሚ 10 ዓመት ተዛሪብካዮ፡ እሞ ንስኻ ባዕልኻ ዝረሳዕካዮ ነገር እዮም ዝዝኩሩልካ/። ኣብ ከምኡስ ኳኽ እዮም -ዘሕልፍዎ ነገር የብሎምን።

ኣይጸንሑን፡ “እዚ ድኣ እቲ ኣብ ‘ሩም ተሻሞ’ እገለ ብዝብል ‘nickname’ ዝዛረብ ንህዝባዊ ግንባርን ህዝቢ ኤርትራን ዝጻረፍ እንድዩ ግዲ!” ብምባል፤

“ዒራ-ዒሮ ኣስፍሮ!” ኢሎም ክጭድሩ ሰማዕክዎም። ነቲ ‘ፓን ሊስት’ ናይ ‘ፓልቶክ’ ዒራዒሮ ኢሎም እዮም ዝጽውዕዎ። ኤርትራዊ ርእሱ ጥርሑ ስለ ዝዀነ እዩ መስለኒ - ንሓሳብ ብሓሳብ ናይ ምብዳህ ብቕዓት የብሉን። “ነቲ መልእኽቲ ንምጥፋእ፡ ነቲ መልእኽተኛ ኣጥፍእ!” ብዝብል ሓደገኛ ፍልስፍና እዩ ዝምራሕ። ብእኣ፡ በታ ዝጻወተላ እያድ ድማ እዩ ዝጠፍእ ንባዕሉ እውን።

ዒራ-ዒሮ ‘ፓልቶክ’ ግን ከምታ ናይ ኤርትራ ዒራ-ዒሮ ኣይኰነትን። መሲልሞም እምበር፡ 3 ግዜ ኣብዚ ዒራ-ዒሮ ዝብልዎ ዘለዉ ‘ስጂን’ ኣእትዮሙኒ እዮም። እቲ ዝገርም፡ ብመንገዲ እቶም ዝልእክዎም ጐይቶቶም ኣቢለ ድማ እየ ዝወጽእ - ብዘይ ገለ ግንዖን ግቦን።

ብዝዀነ፡ እዞም ኣብ ከተማ ሞስ ትኣኪብና ዝቐነና፤ ርሑቕ ኣብ ዘይኰነ ግዜ ብናይ ገዛእ-ርእስና ‘ሩም-ፓልቶክ’ ክንቅልቀል ኢና። ንቛንቋ ትግርኛ ወስኽካ ብ5 ቋንቋታት ዘዛቲ ‘ሩም’ እዩ። ብግዝይኡ ብዝሕበረኩም መስመር ዕዱማት ኢኹም። እቶም፡ “ሰበይትኻ ክትሓርስን ግራትካ ክትጒሰን ጌሽካ ውዓል!” ዝፍልስፍናኹም ግን ጌሽኩም እንተወዓልኩም ክሕሸኹም እዩ መስለኒ። “ንሕብረተሰብይን ነቲ ከም ጸሎተ-ሃይማኖት ዝደግሞ ታሪኸይን፡ ብዓይኒ ነቐፌታ ክርእዮ ኣይደልን እየ!” ዝብል በዓል ‘ረቂቕ ትብዓት’ እንተሃሊዩ፡ ካብ ሕጂኡ ዓዲ እንተኣርሓቐ ይሕሾ። ከምቲ በዓል ራድዮ ፈረንሳይ፡ “ንወገነይ ጠጠው ክብለሉ እኽእል እየ!” ዝብል እንተሃሊዩ ድማ ሃየ ኣብኡን ሽዑን የራኽበና!!

ስድራ-ቤት ‘ፓልቶክን’ ከባቢኣን ሰሰናዩ!